Расійская нафта Urals патаннела да $34 за барэль

• 22.12.2025, 19:02

Бюджэт РФ страчвае мільярды.

Расійская нафта маркі Urals да канца мінулага працоўнага тыдня патаннела прыкладна да $34 за барэль — дакладней $34,82 пры экспарце з Балтыйскага мора, $33,17 — з Чорнага, піша Bloomberg са спасылкай на даныя Argus Media. Для поўнай карціны, ф'ючэрсы на бенчмарк Brent пакуль стабілізаваліся на ўзроўні каля $61

Сітуацыя з расійскай нафтай — адзін з сігналаў таго, што амерыканскія санкцыі працуюць, падкрэслівае Bloomberg. Пасля таго, як адміністрацыя Дональда Трампа у кастрычніку ўключыла пад санкцыі дзве астатнія найбуйнейшыя нафтавыя кампаніі — «Раснафта» і «Лукойл», прадаваць сыравіну стала складаней. Асноўны пакупнік — Індыя — чакае скарачэння імпарту нафты з Расіі ў снежні да 800 000 барэляў у суткі.

Паводле ацэнкі Argus, дысконт на Urals у сярэднім складае каля $27, але на шляху ў Індыю ён скарачаецца прыкладна да $7,5. Колькі з гэтай розніцы ў выніку застаецца расійскаму боку, невядома. Але, як адзначае выданне, чым танней нафта, тым мацней спакуса для НПЗ заплюшчыць вочы на санкцыі і пагадзіцца на закупкі. У мінулым гэта ўжо прыводзіла да таго, што пасля пачатковага абвалу цэны на расійскую нафту зноў выраўноўваліся.