РФ забракавала беларускую бульбу

• 22.12.2025, 15:20

На мяжы не змаглі пацвердзіць яе паходжанне.

Пра спыненне ўвозу 21 тоны бульбы з Беларусі паведаміла Федэральная служба па ветэрынарным і фітасанітарным наглядзе (Расельгаснагляд).

Як адзначаецца, 19 снежня ў пункце пропуску Красны Камень (Злынкаўскі раён Бранскай вобласці) у ходзе фітасанітарнага кантролю транспартнага сродку (судзячы па нумарах — з Гомельскай вобласці) было ўстаноўлена, што бульба прызначалася атрымальніку ў Санкт-Пецярбургу. Пры гэтым груз суправаджаўся несапраўдным фітасанітарным сертыфікатам, які «павінен быў пацвердзіць яе паходжанне, бяспеку ў фітасанітарных адносінах і адпаведнасць усім прад’яўленым патрабаванням».

«У выніку ўпраўленнем Расельгаснагляду ўвоз дадзенага грузу на тэрыторыю Расійскай Федэрацыі быў забаронены. Прадукцыя вярнута адпраўніку. Правапарушальнік прыцягнуты да адміністрацыйнай адказнасці», — адзначаецца ў рэлізе.

Расельгаснагляд рэгулярна вяртае ў Беларусь прадукцыю без адпаведных дакументаў.