Больш за 50 гадоў кіраўніка РПЦ Гундзяева суправаджае таемная грамадзянская жонка
- 22.12.2025, 14:52
Гэта жанчына таксама валодае яго маёмасцю.
Кіраўніка Рускай праваслаўнай царквы Уладзіміра Гундзяева больш за 50 гадоў суправаджае спадарожніца, якая жыве ў яго кватэры і, паводле даных пагранічнай службы, лётае разам з патрыярхам за мяжу.
Прапагандыст Уладзімір Салавёў называў яе траюраднай сястрой уладыкі, але гэта няпраўда, сведчыць аналіз «Праекта». Гэта жанчына таксама валодае яго маёмасцю. То бок яна выконвае функцыі, якія звычайна выконваюць грамадзянскія жонкі. Гэтыя адносіны, забароненыя праваслаўнымі канонамі, працягваюцца некалькі дзесяцігоддзяў.
5 лютага 2019 года ў Баку прызямліўся лайнер Airbus A318-112 Elite, перароблены для перавозкі VIP-пасажыраў. Самалётамі гэтага класа карыстаюцца высокапастаўленыя чыноўнікі або вельмі багатыя людзі, але гэтым разам ім прыляцеў патрыярх Кірыл. Услед за ім з бізнес-джэта сышла жанчына — Лідзія Леонава.
Менавіта яна правяла з Кірылам дзевяць дзён у Баку, дзе ён адзначаў дзесяцігоддзе інтранізацыі і амаль не з'яўляўся на публіцы.
Упершыню імя Леонавай трапіла ў прэсу ў 2012 годзе. Тады разгарэўся скандал вакол элітнай кватэры патрыярха ў маскоўскім Доме на набярэжнай з выглядам на Храм Хрыста Збаўцы. Сусед знізу — экс-міністр аховы здароўя Юрый Шаўчэнка — распачаў рамонт і прычыніў шкоду маёмасці патрыярха будаўнічым пылам. У выніку ў суд паступіў пазоў да Шаўчэнкі, які падала не патрыярх, а Леонава.
Кананічнае права забараняе патрыярху ўступаць у шлюб. Ратаваць рэпутацыю кіраўніка РПЦ даручылі Салавёву. Ён паведаміў, што патрыярх нібыта сказаў яму, што сам у кватэры, атрыманай у падарунак ад уладаў, не пражыў і тыдня, а пастаянна там жылі «дзве яго траюрадныя сёстры» — Леонава і іншая жанчына.
Біяграфіі патрыярха і Леонавай сведчаць, што яны не сваякі. Як пісаў рэлігіязнавец Аляксандр Салдатаў у часопісе «Агонёк» у 2004 годзе, Лідзія Міхайлаўна Леонава (у дзявочасці Халодава) — «дачка кухара Ленінградскага абкама КПСС», з якой Гундзяева «звязывалі самыя цёплыя адносіны».
Паводле даных «Праекта», у 1971 годзе Халодава выйшла замуж за ўкраінца Міхаіла Леонава. Але шлюб, верагодна, у першыя ж гады распаўся, хоць так і не быў афіцыйна скасаваны. Далейшы яе лёс амаль невядомы. Вядома толькі, што калі ў 1984 годзе Гундзяева накіравалі служыць у Смаленск, яна паехала следам за ім.
Аўтарка кнігі «Дабрымі намерэннямі» пра сучасную гісторыю РПЦ Ксенія Лучэнка перадае словы чалавека, які часта бываў у гасцях у Гундзяева, калі той быў яшчэ мітрапалітам: «Лідзія Міхайлаўна вельмі паглыблена ў ягоныя справы. Яна ведае, як чым у доме распараджацца, яна ўключаная ў ягоныя адносіны з рознымі людзьмі, яна сочыць, каму трэба дапамагчы, каму падарунак адправіць». Субяседнік Лучэнкі робіць выснову, што «крыху наіўна меркаваць, быццам гэта траюрадная сястра».
Колькі гадоў таму архімандрыт Ціхан (Зацёкін) апублікаваў кнігу «Іспаведнік веры Хрыстовай іерэй Васіль Гундзяеў», у якой з дапамогай супрацоўнікаў дзяржархіваў сабраў падрабязную інфармацыю пра сям'ю патрыярха аж да прадзеда. Нікога з прозвішчам Халодаў патрыяршы біёграф не згадвае.
На Леонаву аформаваная сямейная кампанія з гаваркой назвай «Владолид» (магчыма, ад імёнаў Уладзімір і Лідзія). Яе асноўны від дзейнасці — кіраванне ўласнай або арандаванай нерухомасцю. Як высветліў «Праект», на гэтую фірму аформлена 200-метровае камерцыйнае памяшканне ў пецярбургскім даходным доме 1874 года пабудовы на набярэжнай Крюкава канала на вугле Гандлёвага моста.
У гэтым жа доме на Леонаву асабіста аформленая яшчэ і 120-метровая кватэра — яе, грамадзянскай жонцы патрыярха, падарыў швейчарац Аляксандр Дзмітрыевіч.
На Леонаву таксама аформлены ўчасткі і катэдж у вёсцы Сіўкова праз дарогу ад падмаскоўнага парка «Патрыёт», дзе знаходзіцца галоўны храм Узброеных Сіл Расіі, і кватэра коштам каля 60 млн рублёў у доме насупраць храма свяшчэннамучаніка Уласія ў Старой Канюшнай слабадзе Масквы.
Усе аўтамабілі ў сям'і таксама аформлены на Леонаву: 15 гадоў таму — Lexus RХ450Н, у 2013 годзе — BMW Х3, а ў 2021-м — BMW X5.