Расія вывела ў Арктыку ўсе свае атамныя ледаколы

• 22.12.2025, 10:20

Такога раней ніколі не было.

Расія ўпершыню задзейнічала ўсе восем атамных ледаколаў на арктычных маршрутах — на фоне пагаршэння эканамічнай сітуацыі і санкцыйнага ціску. Пра гэта 21 снежня напісаў у калонцы для брытанскага выдання The Telegraph Том Шарп, былы капітан патрульнага ледакола HMS Endurance.

Паводле яго слоў, Расія застаецца адзінай краінай у свеце, якая валодае флотам атамных ледаколаў. Гэтыя судны адрозніваюцца вялікай магутнасцю, здольныя праходзіць праз асабліва тоўсты лёд і маюць унікальную канструкцыю, аналагаў якой у заходніх дзяржавах няма.

Ідзе гаворка пра ледаколы «Арктыка», «Сібір», «Урал», «Якуція», «Ямал», «50 гадоў Перамогі», «Таймыр» і «Вайгач». Акрамя іх, у распараджэнні Масквы ёсць яшчэ каля 40 ледаколаў з традыцыйнымі сілавымі ўстаноўкамі.

Як адзначае аўтар, эканоміка РФ, аслабленая вайной супраць Украіны і заходнімі санкцыямі, адчувае сур'ёзны ціск. У гэтых умовах улада на чале з нелегітымным прэзідэнтам Уладзімірам Пуціным спрабуе ўтрымліваць арктычныя гандлёвыя маршруты адкрытымі, каб падтрымліваць экспарт нафты і газу.

У публікацыі падкрэсліваецца, што з надыходам снежня арктычны лёд імкліва таўсцее, аднак Расіі жыццёва неабходныя энергетычныя рэсурсы для функцыянавання ваеннай эканомікі. Менавіта таму Масква імкнецца захаваць адкрытым «крытычна важны марскі доступ» да паўночных рэгіёнаў краіны.