У беларусаў могуць забраць матацыклы, квадрацыклы і лодкі

• 21.12.2025, 16:09

Дакумент падпісаў кіраўнік Мінабароны Хрэнін.

Міністэрства абароны Беларусі зацвердзіла пастанову № 29, якой значна пашырыла пералік транспарту, што падлягае перадачы арміі ў перыяд мабілізацыі або ваеннага становішча. Дакумент, падпісаны міністрам абароны Віктарам Хрэніным, апублікаваны на Нацыянальным прававым інтэрнэт-партале.

Ключавым змяненнем стала ўключэнне ў спіс матацыклаў і маламерных суднаў, што падлягаюць дзяржаўнай рэгістрацыі. Таксама ў пералік дададзены квадрацыклы і снегабалотаходы.

Пастанова абавязвае дзяржаўныя органы і арганізацыі ўсіх формаў уласнасці не толькі весці ўлік тэхнікі, але і загадзя рыхтаваць яе да выкарыстання ў інтарэсах Узброеных Сіл, уключаючы транспарт, што знаходзіцца ў лізінгу. Гаворка ідзе, у тым ліку, пра фарміраванне камплектаў запасных частак, інструментаў і абсталявання для перавозкі асабовага складу.

У абноўлены спіс тэхнікі, якая можа быць забраная ў грамадзян і арганізацый, уваходзяць:

легкавыя аўтамабілі з поўным прывадам (4×4);

аўтобусы і грузавікі ўсіх тыпаў — бартавыя, самазвалы, рэфрыжэратары, фургоны;

спецыяльныя і грузапасажырскія аўтамабілі;

сядзельныя цягачы і прычэпы;

трактары і самаходныя машыны;

квадрацыклы, маламерныя судны і матацыклы.