У Пуціна адхілілі ідэю трохбаковай сустрэчы ЗША, Украіны і РФ

• 21.12.2025, 13:46

Учора амерыканскую прапанову падтрымаў Уладзімір Зяленскі.

Агучаная ідэя трохбаковай сустрэчы паміж Украінай, Расіяй і ЗША на ўзроўні дарадцаў па нацыянальнай бяспецы не з'яўляецца сур'ёзнай.

Пра гэта заявіў памочнік расійскага дыктатара Юрый Ушакоў, паведамляе РБК-Украіна са спасылкай на расійскія СМІ.

Паводле яго слоў, фармат перамоваў паміж Расіяй, Злучанымі Штатамі і Украінай пакуль не прапрацоўваецца. Больш за тое, Ушакоў лічыць, што прапановы, якія Кіеў і еўрапейскія партнёры спрабуюць уключыць у мірны план, нібыта перашкаджаюць дасягненню «доўгатэрміновага міру».

Акрамя таго, Ушакоў паведаміў, што расійскі бок пакуль не бачыў ніякіх дакументаў ЗША наконт мірнага ўрэгулявання вайны.

Нагадаем, учора прэзідэнт Украіны Уладзімір Зяленскі расказаў, што Амерыка прапанавала правесці трохбаковую сустрэчу Украіны, ЗША і Расіі на ўзроўні дарадцаў па нацыянальнай бяспецы (NSA). Ён адзначыў, што Кіеў падтрымлівае гэтую ідэю.