У Эстоніі адбыўся выбух у найбуйнейшым гандлёвым цэнтры

• 21.12.2025, 12:41

Спецслужбы высветлілі, ці быў гэта тэракт.

У суботу ў найбуйнейшым гандлёвым цэнтры Эстоніі ў Таліне адбыўся выбух, які, паводле папярэдніх ацэнак, не мае дачынення да тэрарызму.

Пра гэта паведамляе ERR.

У гандлёвым цэнтры Ülemiste выбухнула урна для смецця, у выніку чаго пацярпеў супрацоўнік, які знаходзіўся паблізу.

Пацярпелы патрабаваў шпіталізацыі, аднак яго жыццю нічога не пагражае.

Дэпартамент бяспекі паліцыі распачаў крымінальную вытворчасць па факце інцыдэнту ў Ülemiste і на гэты момант выключыў пагрозу тэрарызму.

«На гэты момант нічога не сведчыць пра тое, што гаворка ідзе пра выпадак, звязаны з тэрарызмам або экстрэмізмам. Узровень пагрозы не павысіўся, а наяўныя доказы сведчаць пра адзінкавы інцыдэнт», – заявіў генеральны дырэктар Дэпартамента бяспекі паліцыі Марго Паллосон.

На працягу ночы эксперты Дэпартамента выратавальных службаў праверылі ўсе урны для смецця гандлёвага цэнтра і пераканаліся, што іншых прыладаў няма. Дадатковай пагрозы не выяўлена.

«Выбух у найбуйнейшым гандлёвым цэнтры Эстоніі напярэдадні святочных выходных, безумоўна, выклікае ў многіх страх і разгубленасць. Каб захаваць пачуццё бяспекі сярод жыхароў Эстоніі, мы вырашылі ў святочны перыяд прысутнічаць у большай колькасці ў месцах масавага скупчэння людзей. Улічваючы наяўную інфармацыю, можам сказаць, што людзям няма падстаў змяняць свае паводзіны», – адзначыў генеральны дырэктар Паліцыі і памежнай аховы Эгерт Белитшев.

Расследаванне цяпер усталёўвае дэталі і прычыны выбуху.

Акрамя таго, паліцыя звязалася з гандлёвымі цэнтрамі па ўсёй Эстоніі і іх службамі бяспекі і накіравала ім інструкцыі па дзеяннях.