«Ехалі на вучобу, апынуліся на Данбасе»

• 20.12.2025, 22:59

Як РФ прымусова вербуе індыйскіх студэнтаў.

Двое індыйцаў, якія прыехалі ў РФ па студэнцкіх візах, загінулі пасля таго, як іх прымусова завербавалі расіяне для ўдзелу ў вайне супраць Украіны. Пра гэта паведамілі іх родныя, піша The Independent.

Ідзе пра 22-гадовага Аджая Годара з горада Біканер у штаце Раджастхан і 30-гадовага Ракеша Кумара Маур'ю з Утаракханда.

Мужчыны паехалі ў Расію паасобку па студэнцкіх візах, аднак пасля ў відэа, якія яны даслалі сваім сем'ям, яны сказалі, што іх завербавалі ў армію і адправілі на вайну ва Украіну.

«Яны сцвярджалі, што пагадзіліся на, паводле іх меркавання, небаявую грамадзянскую працу прыбіральшчыкаў і памочнікаў, але пазней выявілі, што іх залічылі ў расійскую армію і адправілі на фронт ва Украіне. Верагодна, яны шукалі падпрацоўку па студэнцкай візе», — адзначылі ў матэрыяле.

Годар прыехаў у РФ у лістападзе 2024 года, каб вывучаць мову, але яго завербавалі амаль праз 10 месяцаў. Сям'я студэнта апошні раз гутарыла з ім 22 верасня.

«Я адправіла яго на вучобу, чаму вы кінулі яго ў гэтую вайну? Аджай — мой адзіны сын. Вярніце яго дадому любым коштам», — заявіла маці мужчыны пасля таго, як атрымала вестку пра яго смерць.

У той жа час сябар Кумара распавёў, што сям'я даведалася пра яго смерць праз пяць дзён.

«Сям'і сказалі, што ён загінуў у раёне Данбаса. Апошні раз ён размаўляў з імі 30 жніўня», — сказаў ён.

У The Independent нагадалі, што з пачатку паўнамаштабнага ўварвання РФ ва Украіну ў войска РФ было прызвана 202 грамадзянаў Індыі, 26 з якіх загінулі. Па меншай меры сямёра лічацца зніклымі без вестак.

Міністэрства замежных спраў Індыі заявіла, што працуе над «датэрміновым вызваленнем» 50 грамадзян Індыі, якія цяпер служаць у ўзброеных сілах РФ.