Брытанская разведка раскрыла наступствы ўдару па субмарыне РФ у Наварасійску

• 20.12.2025, 16:59

СБУ правяла беспрэцэдэнтную аперацыю.

Брытанская разведка прааналізавала наступствы начнога ўдару СБУ па расійскай субмарыне класа «Варшаўянка» ў порце Наварасійска, ажыццёўленага беспілотнымі падводнымі апаратамі.

Пра гэта гаворыцца ў аглядзе Мінабароны Вялікабрытаніі.

«Удар, нанесены з дапамогай дрона Sub Sea Baby, верагодна, нанёс значную шкоду падводнай лодцы, пакінуўшы яе няздольнай самастойна плаваць або выконваць задачы. Гэта падводная лодка з'яўляецца платформай, здольнай несці ракеты «Калібр», якая выкарыстоўвалася для удараў па цэлях ва Украіне», — гаворыцца ў аглядзе.

Падводная лодка РФ дагэтуль знаходзіцца ў порце пасля атакі

Брытанская разведка паведамляе, што па стане на 18 снежня пашкоджаная расійская падводная лодка ўсё яшчэ знаходзілася ў порце.

Паводле адкрытых крыніц, іншыя расійскія караблі пакінулі вайскова-марскую базу «Наварасійск» у якасці меры засцярогі, каб паменшыць рызыку патэнцыйных далейшых удараў Украіны.

«Паспяховы ўдар Украіны, які прарваў шматузроўневую абарону Наварасійска, наглядна дэманструе імклівае развіццё майстэрства і магчымасцяў марскіх сіл Украіны, у прыватнасці ў выкарыстанні беспілотных сістэм», — гаворыцца ў аглядзе.

Там дадаецца, што гэта можа «істотна падарваць упэўненасць расійскага ваеннага кіраўніцтва ў мерах абароны Чарнаморскага флоту Расіі».