WSJ: Уіткоф аказаўся пратэжэ Пуціна

• 20.12.2025, 20:20

У Крэмлі па вартасці ацанілі шакавальны ўзровень некампетэнтнасці перамоўшчыка ЗША.

Буйны нью-ёркскі дэвелапер Стыў Уіткоф нечакана стаў ключавым міжнародным перамоўшчыкам прэзідэнта ЗША, нягледзячы на адсутнасць у яго досведу ў сферы геапалітыкі. Хоць вядома, што ён даўно і цесна сябруе з Дональдам Трампам, яго імклівы палітычны ўзлёт, як сцвярджае The Wall Street Journal, быў шмат у чым абумоўлены не асабістай падтрымкай амерыканскага лідара, а дзеяннямі Уладзіміра Пуціна.

Паводле дадзеных выдання, пасля вяртання ў Белы дом Трамп прызначыў Уіткофа сваім спецпасланнікам на Блізкім Усходзе, улічваючы яго дзелавы досвед у Саудаўскай Арабіі. Курыраваць жа пытанні расійска-ўкраінскай вайны першапачаткова павінен быў Кіт Келлог. Аднак сітуацыя хутка змянілася: паводле версіі WSJ, Крэмль умяшаўся ў працэс, і менавіта Уіткоф пачаў весці асноўныя кантакты з Расіяй, тады як роля Келлога была зведзена да другараднай.

Крыніцы газеты сцвярджаюць, што ў Маскве ўважліва аналізавалі псіхалагічныя профілі акружэння Трампа і прыйшлі да высновы, што Келлог не задавальняе Расію ў якасці перамоўшчыка з-за яго адкрыта праўкраінскай пазіцыі. У той жа час Уіткоф быў прызнаны больш адпаведнай фігурай для дыялогу з РФ.

Як адзначае WSJ, на працягу дзесяцігоддзяў амерыканскія чыноўнікі перад візітамі ў Расію атрымлівалі спецыяльныя інструкцыі — так званыя «Маскоўскія правілы», прызначаныя для зніжэння рызык кампраметацыі і вербоўкі з боку расійскіх спецслужбаў. Аднак Уіткоф, паводле выдання, адмовіўся выконваць гэтыя рэкамендацыі, уключаючы выкарыстанне штатнага перакладчыка Дзярждэпартамента ЗША.