Украінскія разведчыкі вывелі з ладу магістральны газаправод у Расіі

• 20.12.2025, 14:58

Транспартаванне спынена.

У Валгаградскай вобласці Расіі адбылося незвычайнае «праседанне грунту», з-за якога быў выведзены з ладу магістральны газаправод «Цэнтральная Азія — Цэнтр».

Як паведамілі крыніцы unian.net у Галоўным упраўленні разведкі (ГУР) Мінабароны Украіны, паводле афіцыйнай версіі расійскага боку, шматкіламетровая труба савецкай пабудовы, якая на працягу многіх гадоў выкарыстоўвалася для транспартавання газу з Туркменістана, Узбекістана і Казахстана, нібыта не вытрымала дзеяння сілы цяжару ў раёне вёскі Раманаўка Альхоўскага раёна Валгаградскай вобласці.

Нягледзячы на заяўленую «незначнасць» здарэння, ужо праз некалькі гадзін да месца аварыі масава пачалі прыбываць аўтамабілі экстрэнных і спецыяльных службаў.

«Верагодна, для фіксацыі чарговага ўнікальнага прыроднага з'явішча — грунту, які па невядомых прычынах выбарачна прасядае акурат пад стратэгічнай газавай інфраструктурай», — падкрэсліў суразмоўца.

Адзначаецца, што газаправод «Цэнтральная Азія — Цэнтр» — гэта ключавы элемент сістэмы, праз якую РФ гадамі імпартавала да 12 млрд куб. м газу штогод.