Мінфін ЗША ўвёў санкцыі супраць блізкага кола Мадуры

• 20.12.2025, 9:45

Яны ўцягнутыя ў карупцыйныя схемы.

ЗША ў пятніцу, 19 снежня, увялі санкцыі супраць сваякоў і саюзнікаў, звязаных з рэжымам Нікаласа Мадуры.

Пра гэта гаворыцца ў заяве Міністэрства фінансаў ЗША.

У ведамстве паведамілі пра ўвядзенне абмежаванняў супраць сямі асоб, якіх амерыканскі бок звязвае з асяроддзем Мадуры і яго сям'ёй.

Сярод іх — блізкія сваякі Карласа Эрыка Мальпіка Флорэса, пляменніка жонкі венесуэльскага лідара. Паводле дадзеных ЗША, ён быў уцягнуты ў карупцыйныя схемы ў дзяржаўнай нафтавай кампаніі краіны.

Акрамя таго, пад санкцыі трапілі маці Флорэса, якая з'яўляецца сястрой жонкі Мадуры, а таксама бацька, сястра, жонка і дачка.

Міністр фінансаў ЗША Скот Бэсент заявіў, што гэтыя людзі дапамагаюць падтрымліваць «злачынную наркадзяржаву Мадуры».