«У цябе ў руках чыясьці кватэра!»

• 2.12.2025, 21:53

Беларускі блогер зарабляе 200 рублёў за кароткае відэа.

Гродзенскі блогер TOP_XA4 просіць за 30-секундны рэкламны ролік у Reels 200 рублёў. Відэамэйкер, на якога ў Instagram падпісаныя больш за 50 тысяч чалавек, паказаў сваю тэхніку і растлумачыў, колькі каштуе стварэнне відэакантэнту, заўважыла Hrodna.life.

Для тых, хто лічыць, што гэта дорага, блогер прадэманстраваў абсталяванне, якое ён выкарыстоўвае ў працы. Напрыклад, фотаапарат са стабілізатарам у яго каштуе 2450 долараў, аб'ектыў — 500 долараў, дадатковыя батарэі — яшчэ 500, відэакамера — 8000 долараў, стабілізуючая тэхніка — 1000 долараў.

MacBook для мантажу абышоўся ў 2250 долараў, шкло для аб'ектыва — у 100 долараў, а акумулятары для відэакамеры — у 300 долараў. Усяго, паводле яго слоў, на тэхніку ён выдаткаваў каля 15 100 долараў.

У каментарах пад публікацыяй падпісчыкі пераважна падтрымалі блогера.

«Гэта вы яшчэ дарогу не ўлічылі», — заўважыў адзін з карыстальнікаў.

Гродзенец адказаў: «Калі б я ўлічваў усё, дык даўно б ужо выбраўся з гэтай галечы», — напісаў ён, ці то жартам, ці то ўсур'ёз.

Іншы каментатар здзівіўся: «У цябе ў руках чыясьці кватэра!»

Блогер адрэагаваў з гумарам: «Ну кватэра — не, а вось машына — так».

Многія адзначылі, што самае дарагое ў здымках — нават не тэхніка, а час спецыяліста.

«Самае дарагое нават не тэхніка — а ваш час (зняць і мантаж)», — напісаў адзін з падпісчыкаў.

Іншыя нагадвалі, што ведаў і навыкаў, набытых за гады навучання, таксама ніхто не адмяняў. Знайшліся і тыя, хто прапанаваў тым, каго пужаюць такія расцэнкі, здымаць самім:

«Дык хай здымаюць на свае тэлефоны — так дакладна танней», — напісала адна з падпісчыц.