У Беларусі назвалі найлепшага футбаліста года

• 2.12.2025, 21:35

Ён крытыкаваў айчынны чэмпіянат і раіў калегам з’язджаць з краіны.

Паўабаронца «Кайрата» з Казахстана і нацыянальнай зборнай Валерый Грамыка быў упершыню прызнаны найлепшым футбалістам Беларусі 2025 года паводле версіі Асацыяцыі «Беларуская федэрацыя футбола» (АБФФ), паведамілі ў яе прэс-службе.

Паўабаронца «Кайрата» Валерый Грамыка стаў найлепшым футбалістам Беларусі ў 2025 годзе і атрымаў «Зорны мяч».

Як піша Sport5.by, гэты сезон для 28-гадовага спартоўца выдаўся асабліва ўдалым: разам з алмацінскім клубам ён прабіўся ў асноўны этап цяперашняга розыгрышу Лігі чэмпіёнаў. Таксама ў гэтым сезоне на рахунку Грамыкі — чэмпіёнскі трафей Прэм'ер-лігі Казахстана і Суперкубак краіны ў складзе «Кайрата».

Усяго ў 2025 годзе беларус правёў 45 матчаў і забіў сем галоў.

У мінулым годзе Валерый Грамыка крытычна ацаніў узровень беларускага чэмпіянату і раіў калегам па цэху з’язджаць з Беларусі.

«З нашага чэмпіянату ў прынцыпе раю з’язджаць. Трэба быць шчырым: з кожным годам ён слабее, моцныя выканаўцы з’язджаюць. Адбіваецца ліміт на заробкі, людзі з’язджаюць туды, дзе прапануюць больш. З-за гэтага клубам даводзіцца ў большай ступені давяраць моладзі. Вядома, праз гэта трэба проста прайсці — патрэбны час. Але ў футбаліста можа і не быць іншага шанцу. Таму, калі ён хоча расці, трэба пагаджацца — і на РПЛ (Расійская прэм’ер-ліга. — Заўв. рэд.), калі клічуць, і на ФНЛ (Футбольная нацыянальная ліга — другі па моцы расійскі чэмпіянат. — Заўв. рэд.)», — казаў Грамыка.