Трамп за некалькі гадзін апублікаваў больш за 160 пастоў у сваёй сацыяльнай сетцы

• 2.12.2025, 19:17

У пэўны момант прэзідэнт ЗША публікаваў больш за адно паведамленне ў хвіліну.

Прэзідэнт ЗША Дональд Трамп у ноч на 2 снежня за амаль чатыры гадзіны апублікаваў больш за 160 пастоў на сваёй старонцы ў сацыяльнай сетцы Truth Social. Пра гэта паведамляе выданне Daily Beast.

Зазначаецца, што пасты былі апублікаваныя ў перыяд паміж 19:09 і 23:57 па ўсходнім часе. Пры гэтым большасць паведамленняў была прадубляваная. У пэўны момант рэспубліканец публікаваў больш за адно паведамленне ў хвіліну.

Выданне адзначае, што такое з Трампам адбылося ўпершыню. Большая частка публікацый складалася з рэпостаў кантэнту, звязанага з рухам MAGA («Зрабім Амерыку зноў вялікай»), уключаючы пасты ад профіляў тэлеканала Fox News, відэаблогера і палітычнага каментатара Бені Джонсана і радыёвядучага Алекса Джонса.

Частка пастоў Трампа была прысвечана крытыцы яго апанентаў. Перад рэпостамі Трамп апублікаваў некалькі ўласных гнеўных пастоў.