Рэкордны аб’ём расійскай нафты застрэў у моры

• 2.12.2025, 18:22

З-за санкцый ЗША.

Расія па-ранейшаму адгружае нафту са сваіх партоў у звыклых маштабах, аднак знаходзіць пакупнікоў становіцца ўсё складаней. Як паведамляе Bloomberg, гэтай восенню аб’ём сыравіны, што «застрэў» у моры, вырас больш як на 20%, а час пераходу танкераў да кітайскіх партоў павялічыўся ў паўтара раза. Удзельнікі рынку нясуць дадатковыя выдаткі, а зніжэнне цаны з-за санкцыйнага ціску яшчэ мацней б’е па даходах расійскага бюджэту.

Паводле звестак агенцтва, да канца лістапада ў танкерах знаходзілася каля 182 млн барэляў расійскай нафты — караблі, якія фактычна ператвараюцца з транспарту ў імправізаваныя сховішчы. У параўнанні з канцом жніўня, калі Дональд Трамп павысіў мыта на імпарт расійскай нафты ў Індыю да 50%, аб’ём павялічыўся на 21%.

Удар па экспарце ўзмацніўся і пасля ўвядзення санкцый супраць «Раснафты» і «Лукойла» ў кастрычніку. Найбуйнейшыя індыйскія перапрацоўшчыкі спачатку цалкам спынілі закупкі расійскай сыравіны, а затым пачалі замяняць яе нафтай ад кампаній, што не трапілі пад абмежаванні. Кітайскія пакупнікі, занепакоеныя дадатковымі рызыкамі, таксама скарацілі закупкі.

Нягледзячы на тое, што сярэднесутачныя пастаўкі з Расіі застаюцца высокімі (3,46 млн барэляў за чатыры тыдні па 30 лістапада), танкеры праводзяць у дарозе значна больш часу. У прыватнасці, маршрут з порта Козьміна да кітайскіх тэрміналаў для суднаў з гатункам ESPO, загружаных у лістападзе, займаў больш за 12 дзён — у той час як у жніўні ён патрабаваў крыху больш за восем.