У ЗША разбіўся самалёт

• 19.12.2025, 22:55

Сярод загінулых — гоншчык серыі NASCAR і ягоная сям’я.

18 снежня ў аэрапорце амерыканскага горада Стэйтсвіл (штат Паўночная Караліна) разбіўся двухматорны самалёт Cessna 550, у выніку чаго загінулі сем чалавек. Пра гэта 19 снежня паведамляе Reuters.

Бізнэс-джэт накіроўваўся са Стэйтсвіла ў штат Фларыда, але неўзабаве пасля ўзлёту паспрабаваў вярнуцца і разбіўся ва ўмовах непагоды.

На месцы падзення, на ўзлётна-пасадачнай паласе, успыхнуў пажар. Аварыя трапіла на відэа.

Прычыны авіякатастрофы высвятляе Нацыянальнае ўпраўленне бяспекі на транспарце.

Сярод загінулых — былы гоншчык сусветнай серыі аўтамабільных гонак NASCAR, 55‑гадовы Грэг Біфл. Агенцтва піша, што самалёт, які разбіўся, належаў кампаніі, звязанай з Біфлам.

Associated Press паведамляе, што загінулі ўсе сем чалавек, якія былі на борце самалёта: Біфл, ягоная жонка, пяцігадовы сын і 14‑гадовая дачка, а таксама трое мужчын, якіх медыя апісалі як «улюбёных многімі ў супольнасці NASCAR».

Біфл у свой час заваяваў больш за 50 перамог у гонках NASCAR. Амаль усю кар’еру ён правёў у камандзе Roush Fenway Racing, штаб‑кватэра якой знаходзіцца прыкладна за 64 км ад месца аварыі.

Загінулы гоншчык меў дазвол Федэральнага ўпраўлення грамадзянскай авіяцыі на кіраванне верталётамі, а таксама адна- і шматматорнымі самалётамі, адзначае агенцтва.