Ларыса Даліна можа страціць яшчэ дзве кватэры

• 19.12.2025, 22:13

На гэты раз у Латвіі.

Расійская спявачка-пуціністка Ларыса Даліна можа застацца без дзвюх кватэр у латвійскай Юрмале агульным коштам 95 млн расійскіх рублёў. Аб гэтым у размове з выданнем «Абзац» заявіў адвакат Аляксандр Бенхін.

Ён звярнуў увагу, што артыстка не можа распараджацца гэтай нерухомасцю з-за санкцый. Кватэры спявачкі трапілі пад замарозку, з-за чаго яна не можа аплаціць рахункі за жыллёва-камунальныя паслугі або прадаць жыллё.

«У Сейме Латвіі кажуць, што трэба нацыяналізаваць тое, што належыць падсанкцыйным людзям», — сказаў юрыст.

Паводле яго слоў, паколькі назапашваюцца даўгі за ЖКГ, эксплуатуючая кампанія або муніцыпалітэт за пэўны перыяд няўплаты могуць падаць у суд і канфіскаваць маёмасць за даўгі. Пры гэтым заплаціць даўгі наўпрост нельга, а спроба здзейсніць такія плацяжы праз трэціх асоб лічыцца крымінальным злачынствам. Пад артыкул Крымінальнага кодэкса Латвіі таксама падпадае пераафармленне нерухомасці або продаж праз пасярэднікаў, адзначыў Бенхін.

Як заявіў адвакат, у такой сітуацыі Даліна можа толькі падаць у суд на дзяржаву і паспрабаваць зняць санкцыі, даказаўшы іх неабгрунтаванасць. Для гэтага неабходна найняць дарагога еўрапейскага адваката, але афіцыйна спявачка не можа яго аплаціць, а неафіцыйна — гэта зноў крымінальнае злачынства.

«Там ганарар вымяраецца дзесяткамі, калі не сотнямі тысяч еўра. У Латвіі ёсць спецыяльныя адвакаты, якія маюць ліцэнзію на працу з падсанкцыйнымі кліентамі, але іх адзінкі», — дадаў юрыст.

16 снежня Вярхоўны суд (ВС) Расіі падчас пасяджэння пастанавіў адмяніць рашэнне трох ніжэйстаячых інстанцый па справе аб кватэры Далінай, заявіўшы, што права ўласнасці застаецца за пакупніком, то бок за Палінай Лур'е. Справу аб выселянні спявачкі, якая перадала махлярам выручку ад куплі, са спрэчнага жылля накіравалі на новы разгляд у апеляцыйную інстанцыю. Пры гэтым ВС дазволіў артыстцы працягваць жыць у гэтай кватэры да рашэння суда другой інстанцыі.