Пад Навапаўлаўкай ЗСУ падціснулі акупантаў і пераразаюць лагістыку

• 19.12.2025, 17:02

«Можна чакаць добрых навін».

ЗСУ ўдалося дасягнуць поспеху на паўднёва-заходнім флангу Навапаўлаўкі Днепрапятроўскай вобласці. Украінскія вайскоўцы «пасунулі праціўніка» на правым беразе рачкі Салёная. Атрыманая перавага развіваецца праз пашырэнне шэрай зоны на поўдзень, асноўныя лагістычныя камунікацыі, якія вядуць у Навапаўлаўку, узяты пад агнявы кантроль і фактычна пераразаюцца.

Пра гэта паведаміў вайсковец 25-й асобнай паветрана-дэсантнай брыгады з пазыўным «Мучны» ў сваім Telegram-канале.

Перспектывы ў акупантаў непрывабныя: застацца без падвозу правіянту і боепрыпасаў.

«Без падвозу боепрыпасаў і падмацавання доўга там не жывуць», — пацвердзіў «Мучны», заклікаўшы чакаць добрых навін з указаннага кірунку.

Прадстаўнік 25-й асобнай паветрана-дэсантнай брыгады таксама апісаў поспехі падраздзялення ЗСУ ў Купянску. Па яго словах, расійскія захопнікі церпяць паразы ў мікрараёне «Плошча Стадыённая»: суцэльнай абароны няма, застаюцца толькі рэшткі. Яны не здольныя спыніць наступ украінскіх вайскоўцаў, «раён паступова адколваецца на нашу карысць» з магчымасцю далейшага прасоўвання.

Украінскім абаронцам удалося выбіць праціўніка і замацавацца на пазіцыях у раёне медыцынскага цэнтра і побач з мясцовай паліклінікай, умацаванне ЗСУ ў гэтым раёне дазваляе кантраляваць прылеглыя вуліцы. Украінскія вайскоўцы таксама замацаваліся ў шматпавярхоўцы паўднёвей школы №4, працуючы па ворагу зверху.

У цэнтры горада ад расійскай лініі таксама засталіся асобныя элементы, але ўсе гэтыя групы схаваліся па падвалах і нават не думаюць пра кантроль перыметра.