Беспрацоўны жыхар Жыткавічаў дамогся выключэння са спісу «дармаедаў»

• 19.12.2025, 14:46

Як яму гэта ўдалося?

У Гомельскай вобласці прайшлі чарговыя пасяджэнні «камісій па працаўладкаванні» — у Жыткавічах і Буда-Кашалёве. Пра тое, што кагосьці з «дармаедаў» удалося ўладкаваць на працу, нічога не паведамляецца, заўважыў «Флагшток».

Пры гэтым чыноўнікі перайшлі да пагроз. Старшыня Жыткавіцкага райсавета Леанід Валатоўскі, які ўзначальвае мясцовую «камісію па працаўладкаванні», заявіў, што «цярпенне грамадства і дзяржавы не бязмежнае».

Паведамляецца, што на пасяджэнні камісіі разглядалі сітуацыі людзей, якія стаяць на ўліку ў крымінальна-выканаўчай інспекцыі. Прычым трох чалавек на пасяджэнне камісіі даставіла міліцыя. Адзін з дастаўленых, як піша раённая газета, «наглядна даказаў, што яго хатняе падвор’е з’яўляецца стабільнай крыніцай даходу, і быў афіцыйна прызнаны занятым».