У Пакроўску Сілы абароны Украіны ўзялі ў палон грамадзян Калумбіі

• 19.12.2025, 10:07

Яны раскрылі схемы расійскай вербоўкі.

У Пакроўску Данецкай вобласці ў палон Сіл абароны Украіны трапілі двое грамадзян Калумбіі.

Пра гэта паведамляе 425-ы асобны штурмавы полк «Скала». Палонныя сцвярджаюць, што прыехалі ў Расію працаваць, а на вайну супраць Украіны трапілі падманам. Ім абяцалі плаціць 2500 долараў у месяц, але грошай яны так і не ўбачылі.

«Калі калумбійцы прыбылі ў Уфу, у іх забралі дакументы, уручылі аўтаматы і без ежы і вады адправілі штурмаваць Пакроўск», — распавядаюць у 425 АШП.

Вайскоўцы таксама апублікавалі відэа размовы з палоннымі калумбійцамі. Адзін з іх распавёў, што яму абяцалі працу зваршчыкам у адным з падраздзяленняў. Другі даведаўся ад знаёмага пра працу ў Расіі, дзе нібыта трэба было ахоўваць газаперапрацоўчы завод.

«Сказалі, што гэта праца максімум на адзін месяц. Гэта аказалася хлуснёй. Мы ляцелі з Баготы ў Стамбул. Са Стамбула — ў Уфу. Калі мы прыляцелі ў Уфу, у нас забралі пашпарты, тэлефоны, усе дакументы. Праз тры дні нас пасадзілі ў аўтобус і везлі прыблізна 36 гадзін у невядомым кірунку, мы не ведалі, куды нас везлі», — кажа грамадзянін Калумбіі.

Калумбійцаў пераконвалі, што яны не будуць ваяваць. Палонны сцвярджае, што з-за такіх абяцанняў на прапановы РФ згаджаюцца многія людзі. Грамадзяне Калумбіі бесперапынна прыбывалі ў Уфу, распавядае мужчына на відэа.

«Яны падманулі мяне так дурна: сказалі, што мне патрэбныя памочнікі, і я паклікаў сябра. Яго забілі, і я гэта бачыў. Я паверыў таму, што мне казалі: што праца будзе бяспечнай, што нас не пашлюць на перадні край», — прызнаўся іншы палонны.

Калумбійцы заяўляюць, што ні разу не стралялі, а іх магазіны былі поўнымі.