Польшча паставіла на баявое дзяжурства ракетныя сістэмы Patriot

• 18.12.2025, 21:08

Варшава стварае шматслаёвую сістэму СПА.

Улады Польшчы паставілі ракетныя сістэмы Patriot на баявое дзяжурства, ракеты знаходзяцца ў стане баявой гатоўнасці. Пра гэта паведаміў міністр нацыянальнай абароны Уладзіслаў Касіняк-Камыш, перадае радыёстанцыя RMF24.

«Гэта ключавы этап рэалізацыі праграмы «Вісла», якая стварае інтэграваную шматслаёвую сістэму СПА Польшчы», — сказаў ён, выступаючы ў 3-й брыгадзе ПРА польскага войска.

Паводле слоў міністра, у перыяд з 2027 па 2029 год у краіне размесцяць яшчэ 48 пускавых установак Patriot, якія будуць інтэграваныя ў адзіную сістэму з амерыканскімі знішчальнікамі F-35 для абароны паветранай прасторы.

У 2024 годзе Польшча падпісала кантракт з ЗША на вытворчасць 48 установак ЗРК Patriot. Паводле слоў пасла ЗША ў Польшчы Марка Бжэзінскага, новыя ўстаноўкі дазволяць краіне атрымаць «найвышэйшыя магчымасці ў супрацьпаветранай абароне».

Бакі кантракта — амерыканская кампанія RTX, якая раней называлася Raytheon Technologies Corporation, і польская Huta Stalowa Wola. Чакалася, што дамова дасць старт рэалізацыі другой стадыі праграмы па стварэнні сістэмы СПА далёкага радыюсу дзеяння Wisla.