Юнакі мінскага «Дынама» згуляюць з «ПСЖ» у Парыжы
- 18.12.2025, 20:17
Сталічная каманда (U-19) упершыню прабілася ў 1/16 фіналу Юнацкай лігі УЕФА.
У швейцарскім Ньёне днямі адбылася жэрэб'ёўка стадыі плэй-оф Юнацкай лігі УЕФА, па выніках якой мінскае «Дынама» даведалася свайго суперніка.
Каманда Сяргея Яромкі у 1/16 фіналу турніру згуляе супраць французскага «Пары Сен-Жэрмен».
Сустрэча адбудзецца 4 лютага 2026 года на трэніровачнай базе парыжан. Старт паядынку — а 16:30.
Згодна з рэгламентам пераможца вызначыцца ў адным матчы.
На этапе кваліфікацыі беларусы перамаглі казахстанскі «Ордабасы», балгарскі «Лудагорэц» і грузінскае «Дынама» з Тбілісі.
«ПСЖ» са свайго боку заняў 13-е месца на агульным этапе шляху Лігі чэмпіёнаў, набраўшы 11 ачкоў у шасці матчах.
Адзначым, што беларуская каманда ўпершыню прабілася на такую стадыю маладзёжнага еўракубка.