У Смалявічах навагоднюю ёлку паставілі ў дзіўным месцы

• 18.12.2025, 13:06

Кіроўцы незадаволеныя.

У райцэнтры Смалявічы Мінскай вобласці, як і ў іншых гарадах краіны, паставілі навагоднюю ёлку. Паставілі на плошчы ў даволі людным месцы, піша blizko.by.

Усе задаволены? Як бы не так. Высветлілася, што ёлку паставілі не на пешаходнай частцы плошчы, а проста на праезнай частцы. Ёлку агарадзілі невялікай агароджай, перад ёй паставілі знакі «цаглінка» (забаронены ўезд у ёлку?!) і «40», а таксама «аб’езд справа».

Відэа, знятае з аўтамабіля, выклалі ў TikTok — і панеслася.

Многія каментатары здзівіліся абурэнню аўтараў роліка і пачалі паведамляць гістарычныя факты:

— Як я памятаю, у гэтым месцы ёлку на Новы год ставілі яшчэ за часоў СССР.

— І што тут смешнага, 40 гадоў жыву ў горадзе, і 40 гадоў яе заўсёды ставяць на гэтай плошчы.

— Мы вельмі рады і ўдзячныя, што яна зноў тут, а не на возеры, гэта традыцыя галоўнай плошчы горада Смалявічы

— Некалькі дзясяткаў гадоў ёлкі на Новы год ставіліся менавіта ў гэтым месцы, што вельмі зручна для старога горада. Бо ісці да ёлкі са старога ў новы горад — далёка, і многія гараджане, па прычыне ўзросту, застаюцца без свята. Плошча вялікая і праезду аўто не перашкаджае.

— Яе ўжо гадоў 40 так ставяць. Вядома, гэта глупства. Месца ў горадзе для ёлак шмат, але, відаць, па звычцы ставяць у адно і тое ж месца.

Аднак знайшліся і такія, хто ўсё ж бачыць у ёлцы на плошчы пэўныя нязручнасці:

— Вакол ёлкі павінны дзеткі бегаць, а тут машыны аб’язджаюць — нейкая лухта.

— Адна ёлка на ўвесь горад — і тая пасярод дарогі.

— Пара ўжо для ёлкі выдзеліць сваю пляцоўку ў цэнтры плошчы. Не заўсёды гэтае месца было так цалкам пакрыта асфальтам. Было значна больш зялёных зон для адпачынку.

— Я там на фуры ехаў. Думаў, прыснілася: ёлка на дарозе.