Мінскі таксіст дапамог затрымаць кур’ера махляроў

• 18.12.2025, 12:38

Затрыманы 19-гадовы замежнік.

Работнік мінскага таксі дапамог супрацоўнікам Дзяржаўтаінспекцыі і крымінальнага вышуку затрымаць 19-гадовага замежніка, які працаваў на тэлефонных махляроў.

«Па заданні куратара фігурант прыехаў у Мінск і забраў у пенсіянеркі больш за 80 тысяч рублёў у эквіваленце. Наяўныя збіраўся вывезці за мяжу на таксі», — паведамляе МУС.

Таксіст па вонкавым выглядзе і паводзінах пасажыра зразумеў, што той замешаны ў крымінальнай схеме, і праз калег паведаміў пра гэта сілавікам. Кур’ера затрымалі.

Ахвярай падману стала 73-гадовая мінчанка. Пад пагрозай крымінальнага пераследу і вобыску ў кватэры яна перадала пасыльнаму нібыта для дэкларавання ўсе зберажэнні. Грошы будуць вярнутыя жанчыне.