Пажар у доме сям’і на Філіпінах знішчыў усё, акрамя Бібліі

• 17.12.2025, 20:04

Фотафакт.

Сям’я з правінцыі Ілокос-Сур на Філіпінах, якая страціла амаль усю маёмасць у выніку моцнага пажару, расказала, што ў агні ацалела толькі Біблія, піша Fox News.

Рут Мэры Рэпуян і яе блізкія вярнуліся на месца здарэння пасля таго, як агонь амаль цалкам знішчыў іх жыллё. Большасць рэчаў ператварылася ў попел і расплаўленыя фрагменты, і сям’я пачала ўважліва аглядваць руіны ў надзеі знайсці хоць нешта, што ацалела.

Падчас пошукаў Рэпуян заўважыла шчыльны прадмет, часткова схаваны пад слоем абгарэлых абломкаў. Мяркуючы, што ён пашкоджаны гэтак жа, як і ўсё астатняе, яна дастала яго, аднак з дзіўленнем выявіла, што гэта сямейная Біблія, якая амаль не пацярпела ад агню.

На апублікаваных кадрах відаць, як жанчына паднімае кнігу з попелу і гартае старонкі, якія выглядаюць цэлымі і не маюць прыкметных слядоў узгарання. Вокладка, пераплёт і папера таксама не дэманструюць прыкмет сур’ёзных пашкоджанняў, нягледзячы на маштаб разбурэнняў вакол.

Побач сям’я знайшла яшчэ адну кнігу, аднак яна была моцна абгарэлая.

«Мы будзем святкаваць Божае Нараджэнне, не маючы нічога. Усё згарэла, і адзінае, што ў нас засталося, — гэта Біблія. Гэта цуд», — сказала жанчына.