Новы прэзідэнт Чылі заклікаў звяргнуць дыктатуру Мадуры

• 17.12.2025, 18:55

Краіна можа далучыцца да шэрагу рэгіянальных саюзнікаў ЗША.

Абраны прэзідэнт Чылі, прадстаўнік жорсткага правага крыла, Хасэ Антоніа Каст, заявіў пра падтрымку любых намаганняў, накіраваных на звяржэнне ўлады дыктатара Венесуэлы Нікаласа Мадуры. Такім чынам, Чылі можа далучыцца да шэрагу рэгіянальных саюзнікаў ЗША ў супрацьстаянні з Каракасам, піша Barron’s (пераклад — сайт Charter97.org).

З адпаведнай заявай Каст выступіў у аўторак падчас візіту ў Аргенціну — ягонай першай замежнай паездкі пасля перамогі на прэзідэнцкіх выбарах. Ён падкрэсліў, што Чылі не мае намеру непасрэдна ўмешвацца ў унутраныя справы Венесуэлы, аднак падтрымае тых, хто зможа «вырашыць гэтую гіганцкую праблему» для ўсёй Лацінскай Амерыкі і нават Еўропы.

Каст усклаў адказнасць за эканамічны крызіс і масавую міграцыю з Венесуэлы на Мадуру, назваўшы яго «наркадыктатарам». Паводле даных міжнародных арганізацый, з 2014 года краіну пакінулі каля сямі мільёнаў чалавек.

Падчас выбарчай кампаніі Каст абяцаў узмацніць міграцыйную палітыку, дэпартаваць сотні тысяч нелегальных мігрантаў, пераважна венесуэльцаў, і ўзмацніць ахову паўночнай мяжы Чылі. Пры гэтым ён прапанаваў стварыць «гуманітарны калідор» праз краіны Паўднёвай Амерыкі, каб мігранты маглі вярнуцца на радзіму.