Беларускія рыбакі па ўсёй краіне хваляцца ўнікальнымі ўловамі

• 17.12.2025, 17:37

Справа ў надвор'і.

Па ўсёй Беларусі людзям з дня ў дзень удаецца злавіць буйную рыбу. Гэтаму паспрыяла надвор'е, паведамляе партал Fishing.by.

Слупок тэрмометра для сярэдзіны снежня анамальна высокі, аднак справа не толькі ў гэтым.

Нядаўна назіралася і пахаладанне — вадаёмы пакрыліся лёдам.

Пацяпленне наступіла хутка, заводзі зноў сталі адкрытымі, але паводзіны рыбы змяніліся. Ідзе гаворка найперш пра драпежнікаў, якія ўжо перайшлі на зімовы рэжым палявання.

Вопытныя рыбакі ведаюць, што ў такі перыяд той жа шчупак актыўна падыходзіць да берага. Там яго ўжо падсцерагаюць спінінгі з прынадамі, і рыба прагна іх заглынае. Падобная сітуацыя ўласцівая сярэдзіне кастрычніка, але з той розніцай, што цяпер на мелкаводдзі замест «травянкі» можна злавіць па-сапраўднаму буйнога шчупака.

Праўда, паводле справаздач спінінгістаў бачна, што трапляецца не толькі шчупак. Нядрэнна ловяцца акуні, буйныя судакі і нават галавені.