ЗСУ вярнулі кантроль над паўночнай часткай Пакроўска

• 17.12.2025, 17:27

Пра гэта заявіў галоўнакамандуючы Сырскі.

Украінскія вайскоўцы аднавілі кантроль над 16 квадратнымі кіламетрамі тэрыторыі ў паўночнай частцы Пакроўска Данецкай вобласці.

Пра гэта паведаміў Галоўнакамандуючы Узброеных Сіл Украіны Аляксандр Сырскі.

Выступаючы на 32-м пасяджэнні Кантактнай групы па пытаннях абароны Украіны «Рамштайн», ён ахарактарызаваў сітуацыю на фронце як складаную. Паводле слоў Сырскага, нягледзячы на значныя страты, расійскія войскі працягваюць наступальныя дзеянні, аднак «істотных аператыўных поспехаў не дасягнулі».

Галоўнакамандуючы нагадаў, што раней украінскім сілам «удалося адкінуць акупантаў ад Куп’янска і ўсталяваць кантроль амаль над 90 працэнтамі тэрыторыі горада».

Кажучы пра Пакроўскі напрамак, Сырскі падкрэсліў: «Супернік ужо больш за 17 месяцаў спрабуе захапіць Пакроўск. Аднак украінскія падраздзяленні ўтрымліваюць абарону і перахопліваюць ініцыятыву. У выніку контрнаступальных дзеянняў быў адноўлены кантроль над 16 квадратнымі кіламетрамі ў паўночнай частцы горада. Таксама вызвалены 56 квадратных кіламетраў тэрыторыі ў раёнах населеных пунктаў Грышына, Котліна і Удачнае на захад ад Пакроўска».