Казахстан пачаў пераводзіць ваенныя заводы на стандарты НАТА
- 17.12.2025, 14:58
Агульны кошт праекта склаў каля $1 млрд.
Казахстан у межах нацыянальнага праекта ASPAN плануе пабудаваць і запусціць чатыры новыя заводы па вытворчасці артылерыйскіх снарадаў і мін, якія будуць адпавядаць стандартам НАТА. Агульны кошт праекта складзе каля $1 млрд, піша moscowtimes.ru
«Казахстан доўгі час не меў уласнай вытворчасці не толькі артылерыйскіх снарадаў і мін, але і патронаў да стралковай зброі. Таму баяздольнасць нашай арміі крытычна залежала ад наяўных на тэрыторыі Казахстана складаў яшчэ савецкай зброі і паставак з Расіі і былых савецкіх рэспублік», — сказаў RTVI высокапастаўлены казахстанскі вайсковец. Ён адзначыў, што ў цяперашняй геапалітычнай сітуацыі краіне «надзвычай важна» мець уласную вытворчасць снарадаў.
Будаўніцтвам ваенных заводаў займаецца казахстанская кампанія Great Sky. Першы намеснік генеральнага дырэктара арганізацыі Андрэй Ціханенка заявіў, што праект мае вялікую перспектыву, паколькі «уся сыравінная база, якая неабходная для вытворчасці боепрыпасаў — метал, бавоўна, кіслоты і іншыя матэрыялы — знаходзіцца ў Казахстане». Адзначаецца, што заводы ў межах праекта ASPAN, акрамя снарадаў паводле стандартаў НАТА, будуць таксама выпускаць артылерыйскія боепрыпасы расійскіх узораў — калібраў 82 мм, 120 мм, 122 мм і 152 мм.
Паводле даных казахстанскіх СМІ, Мінбароны рэспублікі разлічвае, што заводы, што будуюцца, дазволяць не толькі задаволіць унутраныя патрэбы, але і наладзіць экспарт. У той жа час, паводле слоў крыніцы RTVI, гаварыць пра экспарт пакуль рана, бо з моманту паўнамаштабнага ўварвання Расіі ва Украіну ў краіне дзейнічае поўная забарона на продаж за мяжу прадукцыі ваенна-тэхнічнага прызначэння. «Аднак у перспектыве гэта магчымы варыянт, улічваючы, што шэраг краін постсавецкай прасторы актыўна закупляе тэхніку заходняга ўзору», — адзначыў суразмоўца тэлеканала.
Пры гэтым ён запэўніў, што Расія працягвае заставацца найбуйнейшым ваенна-тэхнічным партнёрам і пастаўшчыком зброі Казахстана, але краіна рэалізуе і іншыя праграмы ваенна-тэхнічнага супрацоўніцтва, і іх доля паступова расце.
У 2023 годзе на фоне вайны ва Украіне прэзідэнт Казахстана Касым-Жамарт Такаеў паставіў задачу правесці максімальную лакалізацыю вытворчасці ваеннай тэхнікі і боепрыпасаў. «Браняваная тэхніка, беспілотныя лятальныя апараты, сучасная стралковая зброя — усё гэта мы можам і павінны выпускаць у сябе, у нашай краіне», — адзначыў Такаеў.