У Беларусі працягваюцца затрыманні па «справе Гаюна»

• 17.12.2025, 13:16

Суды ідуць па ўсёй краіне.

У Беларусі працягваюцца затрыманні ў межах крымінальнай справы «Беларускага Гаюна» — праекта блогера Антона Матолькі, паведаміў праваабарончы цэнтр «Вясна».

Праваабаронцам вядомыя імёны 127 фігурантаў расследавання, якіх узялі пад варту. У «Вясне» адзначаюць, што агульная колькасць затрыманых «нашмат большая».

Праваабаронцы адзначылі, што па ўсёй краіне ідуць суды па «справе Гаюна». Абвінавачаным прызначаюць як «хатнюю хімію», так і абмежаванне волі з накіраваннем у калонію. СМІ сцвярджаюць, што ў спісе на затрыманне — больш за тысячу чалавек.

5 лютага 2025 года стваральнік «Беларускага Гаюна» Антон Матолька паведаміў пра ўзлом чат-бота праекта і паведаміў пра пагрозу бяспецы для тых, хто дзяліўся з Telegram-каналам інфармацыяй.

7 лютага стала вядома пра першыя затрыманні інфарматараў «Беларускага Гаюна». Пасля праект спыніў працу. Адзначым, праект блогера Матолькі актыўна падтрымліваўся офісам Святланы Ціханоўскай.