ЗША рыхтуюць новыя санкцыі супраць РФ на выпадак, калі Пуцін адмовіцца ад мірнай угоды

• 17.12.2025, 12:42

Яны могуць быць уведзены ўжо на наступным тыдні.

Адміністрацыя Дональда Трампа рыхтуе новыя санкцыі супраць расійскага энергетычнага сектара, каб узмацніць ціск на Уладзіміра Пуціна, калі той адмовіцца прыняць распрацаваны ЗША мірны план, піша The Moscow Times.

Як паведамляе Bloomberg са спасылкай на крыніцы, знаёмыя з сітуацыяй, новыя санкцыі могуць быць уведзены ўжо на наступным тыдні. Яны закрануць судны «ценявога флоту», а таксама гандлёвыя кампаніі, якія Расія выкарыстоўвае для перавозкі нафты пакупнікам.

Паводле суразмоўцаў агенцтва, распрацаваны Трампам мірны план па-ранейшаму не ўзгоднены па ключавых пытаннях. Застаюцца рознагалоссі адносна лёсу Данбаса, які Крэмль патрабуе цалкам, а таксама адносна будучыні Запарожскай АЭС і замарожаных расійскіх актываў у Еўропе. У мірны план таксама ўключана размяшчэнне ва Украіне еўрапейскіх вайскоўцаў, што Расія раней катэгарычна адхіляла.

Рашэнне аб санкцыях для ціску на Пуціна пакуль не прынята і залежыць ад Дональда Трампа, сказалі крыніцы Bloomberg.

Папярэдні раунд амерыканскіх санкцый, напрыканцы кастрычніка, закрануў «Раснафту» і «Лукойл» — дзве найбуйнейшыя нафтавыя кампаніі Расіі, на якія прыпадае кожны другі барэль здабычы і экспарту. І іх уключэнне ў «чорныя спісы» не паралізавала расійскі нафтавы экспарт, а цэны на нафту з РФ абваліліся.

Барэль гатунку Urals, паводле дадзеных Argus, у сярэдзіне снежня прадавалі па $40,1 у партах Балтыйскага мора і па $38 пры адпраўцы праз Чорнае мора. Зніжкі на Urals адносна маркі Brent, паводле дадзеных аналітыкаў Сбера, дасягнулі $24–26 за барэль, а яе кошт упаў да мінімуму з 2020 года, калі ў свеце лютвала пандэмія Covid. За два месяцы дысконты на Urals выраслі ў 2–3 разы, а яе каціроўкі абваліліся на 28%.