ЗСУ ліквідавалі камандзіра штурмавікоў РФ, які абяцаў захапіць Купянск

• 17.12.2025, 9:43

Ён быў «гаварлівай галавой» Мінабароны РФ.

Сілы абароны Украіны зрабілі «грузам 200» камандзіра штурмавога падраздзялення 121-га матастралковага палка ЗС РФ з пазыўным «Лаўрык», піша «Дыялог.UA».

Ён быў «гаварлівай галавой» Мінабароны РФ, якая хлусіла пра поспехі расіян у горадзе. Аб ліквідацыі вядомага акупанта інфармацыя з’явілася 16 снежня ў Telegram-канале 121-га палка акупантаў.

«Лаўрык» выкарыстоўваўся Міністэрствам абароны РФ і расійскай прапагандай для справаздач аб мнімых поспехах наступу на Купянск. Напрыклад, ролік з ім ваеннае ведамства выпусціла 6 лістапада.

«Упэўнены, што на працягу бліжэйшага тыдня горад будзе цалкам вызвалены. Настрой у ўсіх баявы. Задачу выканаем», — казаў у ім камандзір штурмавікоў. Пасля гэтага ён у аналагічных відэароліках амаль штодня паўтараў сцвярджэнні пра нібыта непазбежны захоп заходняй часткі Купянска і пра «масавую здачу» украінскіх абаронцаў. Рэчаіснасць аказалася іншай.

16 снежня Z-каналы прызналі, што «Лаўрык» стаў «грузам 200» падчас чарговай спробы прасунуцца ў раёне Купянска. Адзін з сімвалаў расійскіх фэйкавых зводак быў знішчаны непасрэдна на тым накірунку, пра які ён публічна хлусіў.

Заўважым, што за апошні месяц кіраўнік Генштаба РФ Валерый Герасімаў і дыктатар Уладзімір Пуцін неаднаразова заяўлялі пра поўны захоп Купянска. Гэтыя сцвярджэнні не мелі нічога агульнага з рэчаіснасцю.

12 снежня гэтую хлусню публічна выкрыў прэзідэнт Украіны Уладзімір Зяленскі, прыбыўшы ў горад і запісаўшы відэазварот да ўкраінцаў на фоне стэлы з назвай Купянска. Сілы абароны Украіны паспяхова працягваюць зачыстку горада ад рэшткаў расійскіх штурмавікоў.

Становішча падраздзяленняў РФ на гэтым участку фронту імкліва пагаршаецца: частка групоўкі апынулася ў акружэнні, іншыя падраздзяленні вымушаныя адступаць за раку Аскол, ратуючыся ўцёкамі.