Алесь Бяляцкі: Трэба дамагацца кардынальных перамен у Беларусі

• 16.12.2025, 16:39

Інакш абмены палітвязняў не маюць сэнсу.

Лаўрэат Нобелеўскай прэміі, былы палітвязень Алесь Бяляцкі у інтэрв’ю літоўскаму выданню LRT заклікаў дамагацца кардынальных змяненняў у Беларусі і ціснуць на лукашэнкаўскі рэжым.

«Трэба разумець, што з такімі людзьмі варта выкарыстоўваць адпаведныя інструменты і гаварыць на зразумелай ім мове, бо, на маю думку, сённяшняя ўлада ў Беларусі не разумее ніякай нармальнай чалавечай мовы, не разумее нармальных чалавечых адносін», — лічыць Бяляцкі.

«Працэс абмену палітвязнямі <…> з’яўляецца вымушаным. Беларускія ўлады ў першую чаргу зацікаўлены ў зняцці эканамічных санкцый. Але яны не зацікаўлены ў тым, каб змяняць сітуацыю да лепшага, даваць людзям магчымасць жыць свабодна, свабодна выказваць сваю думку», — сказаў ён.

«Нам неабходна, каб у Беларусі спыніліся рэпрэсіі, каб не засталося палітвязняў, каб улады пайшлі на сур’ёзныя структурныя змены. Інакш такія абмены палітвязняў не маюць ніякага сэнсу», — сказаў Бяляцкі.