У Польшчы расказалі, ці адновяцца чыгуначныя зносіны з Беларуссю

• 16.12.2025, 15:03

Варшава заявіла, што бяспека для яе застаецца прыярытэтам.

З сакавіка 2020 года пасажырскія цягнікі паміж Польшчай і Беларуссю не курсуюць. Першапачаткова гэтае рашэнне было абумоўлена пандэміяй COVID-19, аднак частка абмежаванняў захавалася і пасля нармалізацыі эпідэміялагічнай сітуацыі. Польскія ўлады тлумачылі меры таксама растучай пагрозай міграцыйнага ціску, паведамляе rynek-kolejowy.pl.

З таго часу адносіны паміж Польшчай і Беларуссю застаюцца напружанымі не толькі з-за незаконнай міграцыі, але і ў сувязі з цесным супрацоўніцтвам Мінска і Масквы. У той жа час на мяжы адбыліся прыкметныя змены: былі адкрыты аўтамабільныя пункты пропуску, якія доўгі час не працавалі — Кузьніца — Брузгі і Боброўнікі — Бераставіца.

«Адкрыццё гэтых пераходаў на тэрыторыі Падляскага ваяводства прайшло без праблем. Мы не зафіксавалі ніводнага інцыдэнту», — паведамілі ў Аддзеле абслугоўвання медыя Міністэрства ўнутраных спраў і адміністрацыі (MSWiA).

Аслабленне абмежаванняў на аўтамабільныя зносіны зноў падымае пытанне аб магчымым аднаўленні пасажырскіх цягнікоў праз чыгуначныя пераходы Кузьніца — Гродна і Тэрэспаль — Брэст.

«Рашэнне аб аднаўленні чыгуначнага руху залежыць ад зніжэння пагрозы масавай міграцыі», — адзначылі ў міністэрстве. «Для нас важна, каб беларускія службы спынілі атакі на тэхнічныя аб’екты польскай мяжы і правакацыі», — дадалі ў прэс-службе MSWiA.

У ведамстве падкрэсліваюць, што міграцыйны ціск з боку Беларусі мае скаардынаваны характар. Таксама адзначаецца падтрымка Мінскам дзеянняў Расіі супраць Украіны.

«Да таго часу, пакуль захоўваецца такая сітуацыя, аднаўленне чыгуначных пасажырскіх зносін немагчымае. Бяспека Польшчы і яе грамадзян для нас з’яўляецца прыярытэтам», — рэзюмавалі ў міністэрстве.