Салдаты РФ апынуліся ў поўным акружэнні ў цэнтры Купянска

• 16.12.2025, 8:16

Акупанты забарыкадаваліся ў падвалах.

Байцы 121-га і 122-га матастрэлкавых палкоў Узброеных Сіл РФ апынуліся ў поўным акружэнні ў цэнтры Купянска Харкаўскай вобласці. Яны забарыкадаваліся ў падвалах жылых дамоў.

Сам Купянск амаль поўнасцю вызвалілі ад расійскіх акупантаў, як паведаміў украінскі партызанскі рух «Атэш» са спасылкай на сваіх агентаў у арміі РФ.

«У цэнтральнай гарадской бальніцы Купянска ў поўным акружэнні засталіся больш за 30 вайскоўцаў 121-га і 122-га матастрэлкавых палкоў. Таксама паступае інфармацыя, што яшчэ некалькі груп вайскоўцаў РФ забарыкадаваліся ў падвалах жылых дамоў непадалёк ад бальніцы — без магчымасці выйсці», — гаворыцца ў паведамленні.

Украінскія партызаны ўдакладнілі, што масавае акружэнне стала нечаканасцю для расіян.

У «Атэшы» падкрэслілі, што выкарыстоўваюць сваё становішча ў штабе дывізіі, каб перадаваць інфармацыю пра планы расійскага камандавання, а таксама сабатаваць загады вышэйшага ваеннага кіраўніцтва РФ.

«Баі працягваюцца на ўскраінах горада», — падкрэслілі ў «Атэшы».