Беспілотнікі СБУ трэці раз ударылі па нафтаздабычы РФ у Каспійскім моры

• 15.12.2025, 18:06

Пашкоджана крытычна важнае абсталяванне аб’екта, вытворчыя працэсы спыніліся.

Дроны далёкага дзеяння Цэнтра спецыяльных аперацый «Альфа» СБУ трэці раз за апошні тыдзень паразілі нафтаздабыўныя платформы кампаніі «Лукойл-Нижневолжскнефть», якія працуюць у Каспійскім моры.

Як паведамілі крыніцы «УНІАН» у спецслужбе, гэтым разам удару падвергнулася платформа на нафтагазакандэнсатным радовішчы імя Карчагіна.

Паводле слоў суразмоўцы, у выніку атакі беспілотнікаў СБУ было пашкоджана крытычна важнае абсталяванне аб’екта, вытворчыя працэсы спыніліся.

— СБУ працягвае актыўную працу, якая змяншае паступленне нафтадолараў у бюджэт РФ, а адпаведна — і здольнасць фінансаваць вайну супраць Украіны. Ніводзін расійскі аб’ект, які працуе на вайну, не ў бяспецы незалежна ад месца яго размяшчэння, — паведаміла інфармаваная крыніца ў СБУ.