У Беларусі можна будзе выбраць палавую прыналежнасць дзіцяці пры ЭКА

• 15.12.2025, 17:20

Але толькі ў асобных выпадках.

Міністэрства аховы здароўя вызначыла пералік медыцынскіх паказанняў да прымянення дапаможных рэпрадуктыўных тэхналогій. Пра гэта вынікае з пастановы Міністэрства аховы здароўя, якая апублікавана на Нацыянальным прававым інтэрнэт-партале.

Дакумент устанаўлівае медыцынскія паказанні і супрацьпаказанні для правядзення экстракарпаральнага апладнення (ЭКА). Сярод паказанняў — мужчынскае бясплоддзе, бясплоддзе няяснага генезу, наяўнасць мутацый генаў у будучых бацькоў, большая эфектыўнасць у параўнанні з іншымі метадамі лячэння. Працэдуру таксама можна праводзіць жанчынам без палавога партнёра.

ЭКА нельга праводзіць пры хваробах эндакрыннай сістэмы, крывяноснай сістэмы, псіхічных захворваннях, наваўтварэннях. Забаронена пры ВІЧ/СНІДзе, гепатытах, туберкулёзе і іншых інфекцыях.

Палавую прыналежнасць будучага дзіцяці таксама можна выбраць пры ЭКА, але толькі ў выпадку наяўнасці ў каго-небудзь з бацькоў спадчынных захворванняў. Сярод іх — мутацыі, звязаныя з палавымі храмасомамі, якія могуць выклікаць інваліднасць або інтэлектуальную адсталасць у дзіцяці, і толькі ў тым выпадку, калі іх нельга выявіць з дапамогай генетычнага тэсту перад імплантацыяй, УГД падчас цяжарнасці або малекулярна-генетычнага аналізу.