Алесь Бяляцкі сустрэўся з прэзідэнтам Літвы

• 15.12.2025, 18:54

Літва падтрымлівае намаганні ЗША па вызваленні ўсіх беларускіх палітвязняў.

У панядзелак прэзідэнт Літвы Гітанас Наўседа сустрэўся з лаўрэатам Нобелеўскай прэміі міру 2022 года Алесем Бяляцкім, які ў суботу выйшаў на волю, піша lrp.lt.

— Мы з вялікай палёгкай успрынялі навіну пра тое, што пасля многіх гадоў несправядлівага зняволення вы нарэшце на свабодзе. Ваша стойкасць, маральная моц і непахісная адданасць чалавечай годнасці — нават у самыя цяжкія часы — натхняюць нас усіх, — сказаў прэзідэнт Літвы.

Гітанас Наўседа адзначыў, што Літва заўсёды падтрымлівала і будзе працягваць падтрымліваць намаганні Злучаных Штатаў Амерыкі па вызваленні ўсіх беларускіх палітвязняў.

— Разам мы паслядоўна падкрэсліваем, што беларускі рэжым павінен пакласці канец усім палітычным рэпрэсіям і не пачынаць новых, што ў Беларусі павінны адбыцца дэмакратычныя, свабодныя і справядлівыя выбары, і што любая падтрымка рэжымам Лукашэнкі агрэсіўнай вайны Расіі супраць Украіны павінна быць спыненая, — сказаў прэзідэнт Літвы.