Прэм'ер-міністр Фінляндыі: Расія з'яўляецца пагрозай сёння, заўтра і ў далёкай будучыні

• 14.12.2025, 23:28

Хельсінкі склікаюць саміт краін Усходняга флангу ЕС.

Група краін ЕС, тэрытарыяльна блізкіх да РФ, на наступным тыдні пачне працу над канкрэтнымі мерамі ўзмацнення абараназдольнасці на фоне пагрозы з боку Масквы. Пра гэта 14 снежня паведаміў прэм'ер-міністр Фінляндыі Петтэры Орпо, яго цытуе Bloomberg.

Орпо ў эфіры Yle распавёў, што 16 снежня ў Хельсінкі адбудзецца саміт Усходняга флангу з удзелам лідараў Швецыі, Польшчы, Эстоніі, Латвіі, Літвы, Румыніі і Балгарыі.

Паводле слоў фінскага прэм'ера, «Расія з'яўляецца пагрозай сёння, заўтра і ў далёкай будучыні», а «найбольшы ціск аказваецца на ўсходнія ўскраіны Еўропы».

Як адзначыў Орпо, лідары краін — удзельніц саміту Усходняга флангу плануюць «паслаць Брусэлю выразны сігнал» і атрымаць сродкі на абаронныя праекты — для пачатку €1,5 млрд.

Аднак ужо ў наступным годзе ў шматгадовым бюджэце ЕС выдаткі могуць дасягнуць €135 млрд, адзначыў прэм'ер Фінляндыі.

Орпо праінфармаваў, што група краін Усходняга флангу мае намер атрымаць фінансаванне на паляпшэнне бяспекі межаў, супрацьпаветраную абарону, выяўленне і супрацьдзеянне беспілотнікам, а таксама развіццё сухапутных войскаў.