Пад Гроднам загарэўся касцёл XVIII стагоддзя

• 14.12.2025, 15:29

Полымя ахапіла дах.

У аграгарадку Сапоцкін Гродзенскага раёна загарэўся касцёл Узнясення Найсвяцейшай Панны Марыі і святога Язафата Кунцэвіча, пабудаваны ў 1789 годзе.

Як паведамляе прэс-служба МНС, полымя ахапіла дах касцёла. Да тушэння прыцягнулі 16 адзінак тэхнікі і 47 чалавек асабістага складу МНС.

Ратавальнікам давялося разабіраць дахавое пакрыццё, каб патушыць схаваныя ачагі гарэння. Складанасць была ў тым, што будынак касцёла двухпавярховы, вышыня ў піках — 25 метраў.

Агнём пашкоджаны дах і лачанне па ўсёй плошчы будынка. Закопчаныя сцены, столь і ўнутранае аздабленне касцёла. Пацярпелых няма.