«Сёння ёсць што святкаваць»

• 13.12.2025, 22:38

Героі змагаюцца за Беларусь кожны дзень.

Каардынатар грамадзянскай кампаніі «Еўрапейская Беларусь» Максім Вінярскі пракаментаваў выхад на волю 123 палітвязняў:

- Жыве Беларусь! Сёння радасны дзень — 123 закладнікі вызвалены з лукашэнкавых засценкаў і паводле звыклай схемы выштурхнутыя за межы Беларусі.

Сярод іх апошні з маіх аднадзельнікаў — Павал Севярынец — нязломны, шчыры, адданы патрыёт Беларусі. Такіх людзей не пазбавіш радзімы — яна назаўсёды ў іхнім сэрцы і душы.

Ніякія турмы і высылкі не дапамогуць дыктатару іх перамагчы. І не хітраму падонку вырашаць будучыню нашай Беларусі, а сапраўдным беларусам. Тым, хто, не шкадуючы часу, здароўя і жыцця, змагаўся і змагаецца за яе кожны дзень. А сёння — святкуем!

Нагадаем, што сёння Лукашэнка вызваліў 123 палітвязняў.

Сярод тых, хто выйшаў на волю, — лаўрэат Нобелеўскай прэміі міру Алесь Бяляцкі, апазіцыйны палітык Павал Севярынец, праваабаронца Уладзімір Лабковіч і шэраг іншых вязняў сумлення.

Большасць памілаваных былі гвалтоўна вывезеныя на тэрыторыю Украіны.