Андрэй Войніч: Гэта радасная і хвалюючая падзея

• 13.12.2025, 20:52

Сёння ў герояў пачынаецца вольнае жыццё.

Каардынатар грамадзянскай кампаніі «Еўрапейская Беларусь» Андрэй Войніч пракаментаваў выхад на волю 123 палітвязняў:

- Віншую ўсіх вызваленых і іх сем’і! Гэта радасная і хвалюючая падзея, тым больш, што сярод вызваленых ёсць такія волаты, як Севярынец, Бяляцкі, Знак, Калеснікава і Бабарыка.

Добра ведаю не па чутках, якія пачуцці цяпер адчуваюць не толькі вызваленыя, але і тысячы тых, хто чакалі і перажывалі за іх кожны дзень.

Самае цяжкае засталося ззаду, і сёння ў герояў пачынаецца вольнае жыццё.

Нагадаем, што Андрэй Войніч правёў у лукашэнкаўскіх турмах амаль пяць гадоў.

25 верасня 2020 года яго разам з іншымі актывістамі «Еўрапейскай Беларусі» затрымалі сілавікі. Войніча асудзілі за «падрыхтоўку да масавых беспарадкаў» на сем гадоў калоніі.

11 верасня 2025 года ён быў вызвалены і прымусова дэпартаваны у Літву разам з іншымі былымі вязнямі сумлення.