Адзіная ў свеце РСЗА на седане BMW прадэманстравала хуткія ўдары па расійскіх пазіцыях

• 13.12.2025, 16:01

Баявой машыне далі пазыўны «Партызан».

Украінскія вайскоўцы на Купянскім напрамку (Харкаўская вобласць) выкарыстоўваюць самаробную рэактыўную сістэму залпавага агню (РСЗА), усталяваную на грамадзянскі аўтамабіль BMW E38. Кадры адпрацоўкі апублікавала прэс-служба 7-га батальёна 114-й асобнай брыгады тэрытарыяльнай абароны ў Facebook 25 лістапада.

Ваенны журналіст і камандзір, вайсковаслужбовец 13-й брыгады «Хартыя» Юрый Бутусаў напісаў у Telegram, што міні-РСЗА абсталяваная трыма накіроўвальнымі ад БМ-21 «Град» для 122-мм снарадаў.

«Гэта адзіная ў свеце РСЗА, усталяваная на седан BMW», – адзначыў Бутусаў.

Паводле слоў ваеннага, такія баявыя машыны ствараюць нечаканы эфект для праціўніка: разгортванне сістэмы і залп адбываюцца імкліва, пасля чаго аўтамабіль імгненна пакідае пазіцыю са хуткасцю да 200 км/г, што крытычна важна для выжывання экіпажа.

У падраздзяленні паведамілі, што баявой машыне далі пазыўны «Партызан».