У метро Мінска расказалі, чым абдзімаюць пасажыраў пры ўваходзе на станцыю

• 12.12.2025, 10:12

Паводле інфармацыі МАП, гэта рэчыва небяспечнае.

Беларуска, якая «абажае пах метро», спытала ў сацсетцы Threads, што «ляжыць у аснове гэтага самага незабыўнага водару пры ўваходзе на станцыю, калі плынь паветра ідзе проста ў твар, раздзімаючы валасы». У Мінскім метрапалітэне ёй адказалі.

У каментарах пад запісам прадстаўнік транспартнага прадпрыемства патлумачыў мінчанцы, што гэта пах крэазоту, якім прапітваюць драўляныя шпалы для абароны ад гніення і насякомых.

«Крэазот — гэта масляністая вадкасць з моцным пахам, што атрымліваецца з дзёгцю, і ён выдзяляе свой водар ва ўмовах тунэля, а цягнікі, рухаючыся, разносяць яго па станцыях. Цяпер старыя драўляныя шпалы замяняюць на бетонныя, таму пах крэазоту паступова знікае, асабліва на новых лініях», — распавялі ў Мінскім метрапалітэне.

Адказ транспартнага прадпрыемства сабраў больш за 2,4 тысячы лайкаў. Некаторыя карыстальнікі жартам занепакоіліся знікненнем звыклага паху метро праз пераход на бетонныя шпалы:

«Замяняюць? Знікае? Жорстачайша патрабуем дыфузары з водарам крэазоту ў метро!»

«Не, калі ласка, не трэба. Страціўшы пах метро, мы страцім яго душу».

«А можна раз на тыдзень проста паліваць якую-небудзь частку станцыі гэтай жыжай? Хоць бы на сіняй лініі. Я гатовы заданаціць».

«Пах метро і начнога чыгуначнага вакзала заўсёды хвалюе і вяртае ў дзяцінства. Шкада, што перадавыя тэхналогіі пазбаўляюць нас такой асалоды. Можа, прыдумаюць асвяжальнік паветра з пахам метро?!»

Нагадаем, паводле звестак Міжнароднай арганізацыі працы, крэазот аказвае раздражняльны ўплыў на вочы, скуру і дыхальныя шляхі. Ён належыць да ўмоўна канцэрагенных рэчываў, піша Вялікая расійская энцыклапедыя.