Польскі генерал Яраслаў Грамадзіньскі: Калі Расія нападзе, мы ўвойдзем у Калінінград
- 11.12.2025, 22:54
Былы камандуючы Еўракорпуса папярэдзіў Маскву.
Былы камандуючы Еўракорпуса, генерал Яраслаў Грамадзіньскі, у інтэрв’ю польскаму выданню Fakt заявіў, што НАТА варта ажыццявіць інтэрвенцыю ў Калінінградскую вобласць у выпадку нападу Расіі. Паводле слоў Грамадзіньскага, стратэгія Польшчы павінна наўпрост прадугледжваць магчымасць нейтралізацыі пагрозы, што ідзе з Калінінграда, а пры прыняцці рашэння пра напад Масква павінна ўлічваць наступствы такіх дзеянняў для Калінінграда.
Для блакады рэгіёна спатрэбяцца сілы, у тры разы большыя за групоўку, неабходную для яго «вывядзення з ладу», — заявіў Грамадзіньскі. Ён дадаў, што за дзесяцігоддзі ў арміі ўкаранілася думка, што па Калінінградзе нельга наносіць удар у адказ, нават калі ён стварае пагрозы краінам НАТА. «Сёння логіка іншая: калі вы атакуеце нас, мы можам увайсці туды. І Расія павінна гэта разумець», — заявіў ён. На думку Грамадзіньскага, такі сігнал сфармуе для Крамля стратэгічныя дылемы, а адкрытае агучванне такіх сцэнароў умацоўвае нацыянальную бяспеку краін НАТА, паколькі дэманструе рашучасць абараняць тэрыторыю ўсімі даступнымі сродкамі.
Грамадзіньскі лічыць, што расійская армія не зможа аднавіць баяздольнасць раней, чым праз пяць–шэсць гадоў. І толькі пры ўмове доступу да тэхналогій і рэсурсаў, якія цяпер абмежаваныя. Згодна з ацэнкамі генерала, Расія страціла сотні тысяч вайскоўцаў і дзясяткі тысяч адзінак бранятэхнікі і артылерыі, што робіць немагчымым вядзенне новых наступальных аперацый па-за межамі Украіны ў сярэднетэрміновай перспектыве.
Аднак гэта не азначае адсутнасці рызыкі. Масква актыўна перабудоўвае вайсковую інфраструктуру, рэфармуе Заходнюю ваенную акругу і праводзіць вучэнні, якія мадэлююць новыя сцэнары канфлікту з НАТА. «Расія разумее свае слабыя месцы, але вучыцца хутка», — адзначыў былы камандуючы. Ён дадаў, што Польшча і Еўропа ўжо сутыкаюцца з нелінейнымі дзеяннямі Расіі. «Мы жывём ва ўмовах пастаяннай гібрыднай вайны, і трэба прызнаць гэта як новую нармальнасць», — падсумаваў Грамадзіньскі. Яго словы перагукаюцца з пазіцыямі іншых камандзіраў НАТА. Раней вярхоўны галоўнакамандуючы Аб’яднанымі сіламі Альянсу ў Еўропе (SACEUR) генерал Алексус Грынкевіч пацвярджаў, што планы на выпадак прамой канфрантацыі з Расіяй уключаюць сцэнар для Калінінградскай вобласці.