Белы дом: Трампу надакучылі сустрэчы дзеля саміх сустрэч

• 11.12.2025, 23:29

Кэролайн Левіт паведаміла пра надзвычайнае разчараванне Трампа Расіяй і Украінай.

Прэзідэнт ЗША Дональд Трамп у найвышэйшай ступені разчараваны абодвума бакамі канфлікту ва Украіне, заявіла прадстаўніца Белага дома Кэролайн Левіт на брыфінгу. Трансляцыя даступная на YouTube-канале Белага дома.

«Яму надакучылі сустрэчы толькі дзеля сустрэч. Ён больш не хоча размоваў, ён хоча дзеянняў, ён хоча завяршэння гэтай вайны. Адміністрацыя [прэзідэнта ЗША] патраціла больш за 30 гадзін толькі за апошнія некалькі тыдняў на сустрэчы з расіянамі, украінцамі і еўрапейцамі і размовы з імі», — сказала яна.

Так Левіт пракаменціравала інфармацыю пра тое, што 13 снежня ў Парыжы адбудзецца сустрэча прадстаўнікоў Украіны, Францыі, Германіі, Вялікабрытаніі і ЗША, дзе яны абмяркуюць мірнае ўрэгуляванне вайны.