Украіна перадала ЗША адказ на мірны план Трампа

• 11.12.2025, 8:58

Перад гэтым Кіеў некалькі дзён раіўся з еўрапейскімі партнёрамі.

Украіна 10 снежня перадала ЗША свой паэтапны адказ на апошні праект «мірнага плана Трампа», паведамляе Axios са спасылкай на ўкраінскіх і амерыканскіх чыноўнікаў.

Па дадзеных выдання, кіраўнік Савета нацыянальнай бяспекі і абароны Украіны і галоўны перамоўнік Уладзіміра Зяленскага Рустэм Умераў накіраваў адказ на мірны план прадстаўніку і зяцю Дональда Трампа Джарэду Кушнеру.

Крыніца ў Кіеве патлумачыла, што ўкраінскі варыянт дакумента ўтрымлівае заўвагі, удакладненні і прапановы, якія павінны зрабіць увесь праект мірнага пагаднення «рэалізуемым». Падрабязнасці гэтых праўкаў не прыводзяцца, але ўдакладняецца, што Украіна таксама прадставіла новыя ідэі, якія датычацца спрэчных пытанняў — статусу тэрыторый і сітуацыі вакол Запарожскай АЭС.

Перад гэтым Кіеў некалькі дзён раіўся з еўрапейскімі партнёрамі — найперш Францыяй, Германіяй і Вялікабрытаніяй.

Тым часам сам Трамп таксама правёў тэлефонную размову з лідарамі «вялікай тройкі» ЕС. Па яго словах, абмеркаванне сітуацыі ва Украіне праходзіла «ў даволі рэзкіх выразах». Еўрапейскія лідары прапанавалі арганізаваць яго асабістую сустрэчу з Зяленскім на бліжэйшыя выхадныя дзе-небудзь у ЕС, аднак Трамп адрэагаваў стрымана, адзначыўшы, што не збіраецца «марнаваць час дарэмна».

Чакаецца, што ўжо 11 снежня высокапастаўленыя вайскоўцы ЗША і Украіны правядуць анлайн-сустрэчу, каб працягнуць абмеркаванне асобных палажэнняў мірнага плана.