Прэзідэнт Чэхіі заклікаў новы ўрад краіны не спыняць дапамогу Украіне

• 10.12.2025, 21:14

Гэта важна для бяспекі і эканамічных магчымасцей самой Чэхіі.

Прэзідэнт Чэхіі Пётр Павел заклікаў новы ўрад працягваць аказваць Украіне дапамогу, паколькі гэта таксама важна для бяспекі і эканамічных магчымасцей самой Чэхіі. Пра гэта піша ČTK у сераду, 10 снежня.

Павел адзначыў, што спыненне дапамогі зробіць немагчымым патэнцыйнае супрацоўніцтва Чэхіі з Украінай у сферы аднаўлення.

«Нават калі адкінуць салідарнасць, абарону прынцыпаў і каштоўнасцяў і паглядзець на гэта чыста прагматычна, для мяне няма сэнсу спыняць падтрымку Украіны цяпер. Бо такім чынам мы закрываем дзверы для магчымога далейшага супрацоўніцтва ў аднаўленні Украіны, якое рана ці позна адбудзецца. Таму нават тыя, хто не схільны лічыць, што краіне, на якую напалі, трэба дапамагаць, павінны глядзець на гэта так: падтрымка бяспекі Украіны павышае і нашу бяспеку ў будучыні, а акрамя таго, можа быць даволі важнай эканамічнай магчымасцю», — адзначыў Павел падчас сустрэчы з гарадскімі дэпутатамі ў горадзе Ліберэц.