На трасе М1 адкрылі найдаўжэйшы ўчастак кантролю сярэдняй хуткасці

• 10.12.2025, 20:53

Яго выбралі невыпадкова.

На трасе М1 Брэст — Мінск — мяжа РФ адкрыты найдаўжэйшы ў краіне ўчастак кантролю сярэдняй хуткасці руху, паведамілі ў ДАІ.

Адрэзак размешчаны на тэрыторыі Івацэвіцкага раёна Брэсцкай вобласці. Яго даўжыня складае 25 кіламетраў (з 151-га па 176-ы кіламетр трасы).

У ДАІ растлумачылі, што на дадзеным участку за пяць гадоў адбылося 24 ДТЗ, у якіх 15 чалавек загінулі і 30 атрымалі траўмы.

Нагадаем, звычайная камера фіксуе хуткасць руху аўтамабіля ў канкрэтнай кропцы. Кантроль сярэдняй хуткасці руху — гэта сістэма фіксацыі парушэнняў, якая выкарыстоўвае камеры на ўездзе і выездзе працяглага ўчастка дарогі для разліку сярэдняй хуткасці аўтамабіля па формуле «адлегласць/час», каб прадухіліць рэзкія тармажэнні перад камерамі.